Innan stjórnar Kviku banka hf. starfa þrjár undirnefndir, áhættunefnd, starfskjaranefnd og endurskoðunarnefnd. Nefndirnar undirbúa umfjöllun hjá stjórn á tilteknum starfssviðum og annast nánari athugun á málum. Ákvörðunarvald og ábyrgð er óskert hjá stjórn.

Stjórn skipar nefndarmenn í undirnefndir á fyrsta reglulega stjórnarfundi eftir aðalfund bankans og tekur ákvörðun um hverjir skuli vera formenn nefnda.

Undirnefndir stjórnar setja sér starfsreglur sem staðfestar eru af stjórn bankans. Formenn undirnefnda skulu gera stjórn reglulega grein fyrir störfum þeirra svo og þegar einstök mál koma til umræðu á stjórnarfundi hafi þau verið rædd í nefndunum. Stjórnarmenn skulu auk þess hafa aðgang að gögnum og fundargerðum undirnefnda.

Áhættunefnd

Áhættunefnd bankans sinnir ráðgjafar- og eftirlitshlutverki fyrir stjórn Kviku, meðal annars vegna mótunar á áhættustefnu og áhættuvilja samstæðunnar og starfar í umboði stjórnar bankans við eftirlit með framkvæmd á Áhættustefnu samstæðu. Nefndin hefur eftirlit með stjórnun áhættuþátta samstæðunnar og fyrirkomulagi og virkni áhættustýringar. Nefndin skal fjalla um áhættumenningu bankans og áhættuvilja.

Nefndina skipa: Páll Harðarson, formaður, Sigurður Hannesson og Ingunn Svala Leifsdóttir.

Starfskjaranefnd

Starfskjaranefnd bankans sinnir ráðgjafar- og eftirlitshlutverki fyrir stjórn Kviku í tengslum við starfskjör og skal vera stjórn til ráðgjafar hvað varðar starfskjarastefnu félagsins og leggja sjálfstætt mat á stefnuna og framkvæmd hennar. Í því felst m.a. að tryggja að kaupaukar styðji við trausta áhættustýringu og hvetji ekki til óhóflegrar áhættutöku. Starfskjaranefnd ber ábyrgð á undirbúningi ákvarðana um starfskjör, þ.m.t þeirra ákvarðana sem hafa áhrif á áhættu og áhættustýringu bankans og þeirra ákvarðana sem stjórn eða framkvæmdastjóri tekur, með hætti sem tekur tillit til langtímahagsmuna hluthafa, fjárfesta og annarra hagsmunaaðila bankans og almannahagsmuna.

Nefndina skipa: Guðjón Reynisson, formaður, Sigurður Hannesson og Helga Kristín Auðunsdóttir.

Endurskoðunarnefnd

Endurskoðunarnefnd bankans sinnir ráðgjafar- og eftirlitshlutverki fyrir stjórn bankans, m.a. við að tryggja gæði ársreikninga og annarra fjármálaupplýsinga bankans og óhæði endurskoðenda bankans. Nefndin hefur eftirlit með vinnuferli við gerð reikningsskila, virkni innra eftirlits, störfum innri og ytri endurskoðunar, auk þess að setja fram tillögu til stjórnar um val á endurskoðenda eða endurskoðunarfyrirtæki.

Nefndina skipa: Ingunn Svala Leifsdóttir, formaður, Helga Kristín Auðunsdóttir og Margrét Flóventz.

Endurskoðun

Ytri endurskoðendur bankans eru Deloitte ehf.