Sem aðili á fjármálamarkaði og fjármálaráðgjafi í skilningi reglugerðar Evrópuþingsins og ráðsins (ESB) nr. 2019/2088 um upplýsingagjöf tengda sjálfbærni á sviði fjármálaþjónustu (e. Sustainable Finance Disclosure Regulation, „SFDR“) hefur Kvika tekið saman upplýsingar til samræmis við kröfur reglugerðarinnar.
SFDR kveður á um samræmdar reglur um upplýsingagjöf til fjárfesta tengt sjálfbærni og sjálfbærniáhættu. Aðilar á fjármálamarkaði og fjármálaráðgjafar skulu birta á vefsvæðum sínum upplýsingar um það hvernig áhætta tengd sjálfbærni er felld inn í fjárfestingarákvarðanir og fjárfestingarráðgjöf og hvort tekið sé tillit til neikvæðra áhrifa fjárfestinga á sjálfbærni. Tilgangur upplýsingagjafarinnar er að gera fjárfestum kleift að bæta upplýsingagjöf til fjárfesta áður en fjárfestingarákvörðun er tekin.
3. gr. SFDR. – Gagnsæi í áhættustefnu um sjálfbærni
Aðilar á fjármálamarkaði skulu birta á vefsíðum sínum upplýsingar um stefnur sínar um hvernig áhætta tengd sjálfbærni er felld inn í fjárfestingarákvörðunarferli þeirra og fjárfestingarráðgjöf.
Stjórn Kviku banka hefur samþykkt Sjálfbærnistefnu og Stefnu um sjálfbærniáhættu sem skilgreinir umgjörð fyrir stýringu sjálfbærniáhættu í samræmi við gildandi kröfur og lög. Bankinn fylgir einnig Stefnu um ábyrgar lánveitingar og fjárfestingar.
Starfsemi sem fellur undir ákvæði 3. gr. SFDR fer að mestu fram hjá Kviku eignastýringu innan samstæðu Kviku. Nálgast má upplýsingar um hvernig áhætta tengd sjálfbærni er felld inn í fjárfestingarákvarðanir og ráðgjöf á heimasíðu Kviku eignastýringar.
4. gr. SFDR. – Gagnsæi í tengslum við neikvæð áhrif á sjálfbærni á einingastigi
Aðilar á fjármálamarkaði skulu birta og uppfæra á vefsíðum sínum upplýsingar um hvort þeir taka tillit til helstu neikvæðu áhrifa fjárfestingarákvarðana á sjálfbærniþætti. Ef aðilar taka ekki tillit til neikvæðra áhrifa fjárfestingaákvarðana á sjálfbærniþætti skal skýra frá ástæðum fyrir því hvers vegna þeir gera það ekki.
Ákvæði 4. gr. SFDR ná til aðila á fjármálamarkaði sem eru með fleiri en 500 starfsmenn og móðurfélag samstæðu sem eru með fleiri en 500 starfsmenn. Kvika nær ekki þeim viðmiðum, hvorki sem aðili á fjármálamarkaði né sem móðurfélag samstæðu.
Kvika tekur sem stendur ekki tillit til neikvæðra áhrifa fjárfestingaákvarðana og fjárfestingarráðgjafar á sjálfbærni. Ófjárhagslegar upplýsingar útgefenda sem fjárfest er í innan samstæðunnar eru enn af skornum skammti og gæði upplýsinganna oft á tíðum ófullnægjandi sem gerir gagnasöfnun erfiða.
Frekari upplýsingar um nálgun Kviku eignastýringar á framangreint má finna á heimasíðu Kviku eignastýringar.
5. gr. – Gagnsæi starfskjarastefnu í tengslum við hvernig áhætta tengd sjálfbærni er felld inn
Starfskjarastefna Kviku banka er uppfærð árlega eftir samþykki hluthafafundar Kviku og er henni meðal annars ætlað að tryggja að starfskjör samræmist gildum Kviku um langtímahugsun, sjálfbærni, stöðu félagsins á hverjum tíma, lögum og reglum, góðum stjórnar- og viðskiptaháttum og heilbrigðum og traustum rekstri félagsins.
Í stefnunni er gert ráð fyrir kaupaukakerfi sem tekur mið af árangursviðmiðum sem ná meðal annars til sjálfbærniáhættu. Áhersla er lögð á að starfsfólk styðji við innleiðingu á sjálfbærnistefnu Kviku í verklag innan einstakra sviða og fylgi stefnum samstæðunnar sem snerta á sjálfbærniáhættu, þar á meðal við fjárfestingarákvarðanir og fjárfestingarráðgjöf.
Samantekt um hvernig sjálfbærniáhætta er felld inn í starfskjararstefnu Kviku banka