12. maí 2026
Kröftug aukning vaxtatekna og lækkun rekstrarkostnaðar.
Á stjórnarfundi þann 12. maí 2026 samþykktu stjórn og forstjóri árshlutauppgjör samstæðu Kviku banka hf. fyrir fyrsta ársfjórðung 2026.
Helstu atriði í afkomu fyrsta ársfjórðungs (1F 2026):
Helstu atriði efnahags þann 31.3.2026:
Stjórn bankans hefur boðað til hluthafafundar þann 4. júní 2026 þar sem lögð er til sérstök arðgreiðsla að fjárhæð kr. 2,35 á hlut, eða rúmir 10 milljarðar króna. Á aðalfundi 18. mars kom fram að eiginfjárstaða félagsins yrði áfram mjög sterk og að stjórn myndi meta frekari útgreiðslur síðar á árinu. Í ljósi þess að samruni Kviku og Arion banka verður ekki að veruleika er nú til staðar aukið svigrúm til að skila fjármunum til hluthafa.
Við mótun tillögu stjórnar var einnig tekið mið af fyrirliggjandi heimild til kaupa á eigin hlutabréfum fyrir allt að 10% af hlutafé félagsins. Stjórn stefnir þannig, ef aðstæður leyfa, einnig að því að kaupa eigin hlutabréf fyrir allt að fjóra milljarða króna síðar á árinu.
Ármann Þorvaldsson, forstjóri Kviku:
„Fyrsti ársfjórðungur ársins 2026 var mjög góður í rekstri bankans, vaxtatekjur halda áfram að aukast, kostnaðaraðhald er að skila sér og við sjáum góðan vöxt í lykilþáttum starfseminnar.
Skömmu eftir lok fjórðungsins var tilkynnt um að hætt hefði verið við samrunaviðræður Kviku og Arion, í kjölfar niðurstaðna forviðræðna við Samkeppniseftirlitið. Mikil og vönduð vinna var lögð í þessar viðræður enda töldu samrunaaðilar allar vísbendingar til þess að mikil verðmæti hefðu skapast fyrir hluthafa og viðskiptavini ef af samrunanum hefði orðið.
Bankinn heldur ótrauður áfram á þeirri vegferð sem mörkuð var fyrir um tveimur árum síðan, sem byggist á umtalsverðum vexti með það að markmiði að skapa verðmæti fyrir hluthafa og aðra hagaðila, en afar vel hefur gengið að ná þeim markmiðum sem við kynntum á Fjárfestadegi Kviku 2024.
Mikilvægt næsta skref í þeirri vegferð er að auka skilvirkni fjármagnsskipan bankans. Í apríl gáfum við út í fyrsta sinn svokölluð AT1 skuldabréf, sem teljast til viðbótar eiginfjárþáttar 1, fyrir fjárhæð sem nemur um 4 milljörðum króna. Útgáfan fór fram í Svíþjóð og fékk afar góðar viðtökur þar sem kjörin, 4,25% yfir millibankavöxtum, voru mun hagstæðari en gert hafði verið ráð fyrir.
Andvirði þessarar útgáfu, ásamt mjög sterkri eiginfjárstöðu fyrir hana, gerir stjórn bankans kleift að leggja til rúmlega 10 milljarða arðgreiðslu við hluthafafund sem boðaður hefur verið í byrjun júní. Þess utan gefur sterk eiginfjárstaða okkur mögulegt að stefna að allt að 4 milljarða endurkaupum á árinu, án þess að dregið sé úr áætlunum um lánavöxt né markmiðum um mikinn fjárhagslegan styrkleika.
Ef þessi markmið ganga eftir mun Kvika hafa skilað rúmlega 40 milljörðum króna til hluthafa sinna á einungis tveimur árum, á sama tíma og mjög góður vöxtur hefur verið í starfsemi bankans. Þessi breyting á fjármagnsskipan bankans mun jafnframt að öðru óbreyttu hafa umtalsverð jákvæð áhrif á arðsemi eiginfjár til framtíðar.
Þá verður haldið áfram að sækja fram byggt á þeim sterka grunni sem hefur verið lagður á undanförnum árum, með öflugan rekstur og skýra stefnu að leiðarljósi.“
Kynningarfundur og fjárfestakynning
Kynningarfundur fyrir hluthafa og markaðsaðila verður haldinn miðvikudaginn 13. maí kl. 08:30 í höfuðstöðvum bankans á 9. hæð í Katrínartúni 2, 105 Reykjavík. Fundinum verður jafnframt streymt.
Hægt er að senda tölvupóst með spurningum fyrir fund eða á meðan honum stendur á netfangið; fjarfestatengsl@kvika.is